ଗଞ୍ଜାମ,୧୦/୯(ମନୋଜ ପାତ୍ର):ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ବୁଧବାର ପୂର୍ବାହ୍ନରେ ସାନଖେମୁଣ୍ଡି ବ୍ଲକ ଅନ୍ତର୍ଗତ ଆଡପଡା ଗ୍ରାମ ପଞ୍ଚାୟତରେ ପହଞ୍ଚି ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିବା ସହ ବୃକ୍ଷରୋପଣ କରିଥିବା ଦେଖିବାକୁ ମିଳିଛି। ବୁଧବାର ଦିନ ଜିଲ୍ଲାପାଳ ଶ୍ରୀ କୁଲାଙ୍ଗେ ଓ ବ୍ରହ୍ମପୁର ଉପଜିଲ୍ଲାପାଳ ସିନ୍ଧେ ଦତ୍ତାତ୍ରେୟ ଭାଉ ସାହେବ ପ୍ରଥମେ ସନଖେମୁଣ୍ଡି ବ୍ଳକର ଆଡପଡା ଗ୍ରାମରେ ପହଞ୍ଚି ସେଠାରେ ଚାଲିଥିବା ନବ ନିର୍ମାଣ ରୁରାଲ ପାର୍କ ଓ ଏମ୍ ଜି ଏନ୍ ଆର ଇ ଜି ଏସ ଯୋଜନାରେ ଚାଲିଥିବା ଆଦର୍ଶ ପୋଖରୀ ନିର୍ମାଣ କାର୍ଯ୍ୟଗୁଡ଼ିକୁ ବୁଲି ଦେଖିବା ସହ ସେଠାକାର ସ୍ଥିତି ପଚାରି ବୁଝିଥିଲେ। ଏଥିସହ ଗ୍ରାମରେ ରହିଥିବା ଇଶାଣେଶ୍ବର ପାଠାଗାର ଓ ଇଶାଣେଶ୍ବର ମନ୍ଦିର ଚତୁଃପାର୍ଶ୍ଵରେ ଚାରାରୋପଣ କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହିପରି ବ୍ଳକର ଡେଙ୍ଗାଡି ପଞ୍ଚାୟତର କମଳାଦେଇପୁର ଗ୍ରାମ ରାସ୍ତାରେ ରହିଥିବା ଚାଉଳ ଗୋଦାମର ସ୍ଥିତି କିଭଳି ରହିଛି ତଦାରଖ କରିବା ସହ ସେଠାରେ ମଧ୍ୟ ବୃକ୍ଷରୋପଣ କରିଥିବା ସୂଚନା ମିଳିଛି । ଜିଲ୍ଲାପାଳଙ୍କ ଏହି ଗସ୍ତ ସମୟରେ ବ୍ଳକ ଉନ୍ନୟନ ଅଧିକାରୀ ଗାୟତ୍ରୀ ଦତ୍ତ ନାୟକଙ୍କ ଉପସ୍ଥିତିରେ ସ୍ଥାନୀୟ ସରପଞ୍ଚ ନୀଳମାଧବ ରାଉତ , ଇଶାଣେଶ୍ବର ମନ୍ଦିର ଉନ୍ନୟନ କମିଟି ସଭାପତି ବନମାଳୀ ପ୍ରଧାନ , ଉମାଚରଣ ପ୍ରଧାନ , ଡାକ ରାଉତ ସମେତ ବହୁ ସଦସ୍ୟ ଉପସ୍ଥିତ ରହି ବୃକ୍ଷରୋପଣ କାର୍ଯ୍ୟରେ ସହଯୋଗ ପ୍ରଦାନ କରିଥିଲେ ।
